Huling araw na sa Martes, May 31, ng Bayanihan e-Konsulta, ang libreng teleconsultation na inilunsad ng Office of the Vice President sa pamumuno ni Vice President Leni Robredo sa kasagsagan ng COVID-19 pandemic.
Sa Facebook page ng Bayanihan e-Konsulta, pinasalamatan sa pamamagitan ng isang post ang lahat ng mga doktor, nars, at maging ang mga non-medical professional na nag-volunteer na nakiisa sa pamamagitan ng pagbibigay ng libreng serbisyo.
“Nais po naming ipaalam na magtatapos na ang serbisyo ng Bayanihan e-Konsulta sa Martes, May 31, 2022. Taos-puso kaming nagpapasalamat sa lahat ng nakiisa sa inisyatibo nating ito upang makapaghatid ng kinakailangang tulong medikal sa ating mga kababayan ngayong panahon ng COVID-19 pandemic,” saad ng statement.
“Sa lahat ng ating volunteer doctors, nurses, at iba pang medical professionals, pati na rin sa mga non-medical volunteers na naglaan ng kanilang oras at kakayahan para maging matagumpay ang ating programa, maraming salamat po sa inyo,” pagpapatuloy nito.
Bagama’t magtatapos na ay pinatunayan lamang daw ng mga bumubuo sa Bayanihan e-Konsulta na walang imposible basta nagkakaisa.
“Hindi matatawaran ang inyong dedikasyon, sakripisyo, at serbisyo sa publiko. Nagpapasalamat din tayo sa mga partners na nakipagbayanihan sa atin para makarating sa mas marami pa ang Bayanihan e-Konsulta,” saad nito.
“Sama-sama, pinatunayan natin: walang imposible sa taumbayang nagkakaisa para iangat ang kaniyang kapwa,” dagdag pa ng statement.
For the latest happenings in the Philippines that make the world stop and make the world go, visit Traffic Digest‘s News Section.