Nang sambitin mo ang salitang pangarap, ano ang ibig sabihin mo? Pangarap na handa kang gawin ang lahat para makamtan—o isang bagay na tanggap mo nang hanggang pangarap lamang?
Ang pangarap ay puwedeng iyong gusto mong maging pagdating ng araw, katayuan sa buhay na inaasam, bagay, lugar, pagkain, tao, at marami pang iba.
Ngunit maging totoo tayo.
May mga pangarap na gusto mong makuha—pero gusto mo lang, hanggang “gusto” lang, hindi ka maglalaan ng oras at hindi mo susubukang makamtan. Maaaring dahil hindi mo ganoon kagusto. Puwedeng takot kang mabigo. O pakiramdam mo may iba pang mas karapat-dapat sa oras mo.
May mga pangarap na aabutin mo—pero hindi pa ngayon. Maaaring kulang ka pa para roon. O hindi kaya, may kailangan ka munang unahin. Pero ito, sigurado kang susubukan mong makuha, nasaan ka man ngayon—gaano ka man kalayo—lahat ng daang tatahakin mo e dito papunta, palagi mo itong ikokonsidera.
Samantala, may mga pangarap din na mananatiling hanggang pangarap lamang. Maaaring sinubukan mo na lahat pero wala talaga. Puwede ring makabubuti ito sa iba pero hindi sa iyo. O dahil mali na kuhanin mo ito; dahil bawal, dahil hindi patas, dahil hindi makatarungan.
Kaya dapat alam mo sa una pa lang kung anong klaseng pangarap ang tinutukoy mo, para alam mo kung kailan ka mag-aalis—o maglalagay—ng limitasyon.
Nang sambitin mo ang salitang “pangarap”, ano ang ibig sabihin mo? Pangarap na handa kang gawin ang lahat para makamtan—o isang bagay na tanggap mo nang hanggang pangarap lamang.
© Minsan Okay Lang Ma-traffic | 2019
For the Traffic Feels that make the world stop and make the world go, visit Traffic Digest‘s Literary Section.