Sa pagmamahal sa sarili dapat lagi magsisimula.
Dito mo kuhanin ang pag-ibig na ibibigay mo sa iba. Ito ang bukal na dapat pagmulan ng pagmamahal—sa mga tao man, sa mga bagay, sa mga pangarap, at sa napakarami pang lugar na mapapalapit sa iyo sa daan ng buhay. Hindi ka manlilimos nito. Hindi ka aasa sa kahit sino o sa kahit ano para lamang mabuo.
Higit sa lahat, dito mo dapat kuhanin ang lakas na sa tuwing pinahihina ka ng buhay o ng kapalaran. Ito dapat ang maging rason upang maging kasing tapang ng ikaw na humaharap sa salamin ang ikaw humaharap sa mundo. Hindi ka dapat mawalan ng pag-ibig na iaalay sa sarili mo sa tuwing pagkakaitan ka ng mga bagay na magpapasaya sa iyo. Hindi ka dapat maubusan nito maging sa panahon ng pagkakamali, pagkadapa, pagkaligaw, pagkabigo, at iba pang magpaparamdam sa iyo na hindi ka na kamahal-mahal.
Dito mo kuhanin ang lakas para makabangon at muling magsimula. Dito ka magsimula kapag wala nang natira kung hindi ang mga wakas, ang mga hangganan, at ang mga salita ng mga taong nangakong iibig nang wagas.
Sapagkat sa pagmamahal sa sarili dapat lagi magsisimula—at babalik kapag mauubos ka na.
© Minsan Okay Lang Ma-traffic | 2021
For literary pieces that make the world stop and make the world go, visit Traffic Digest‘s Literary Section.