Matulog ka na.
Huwag ka nang tumingin sa telepono, sa pag-asang kakailanganin niya muli ng kakuwentuhan at numero mo muli ang tatawagan.
Matulog ka na.
Huwag ka nang maghintay sa kanya. Kung gusto niya, kanina pa sana. Sa haba ng maghapon ay hindi mo siya naramdaman—gayon din nang matapos na ang napakahabang araw niya.
Matulog ka na.
Ipikit mo na ang iyong mga mata, panahon na upang ang sarili ay unahin mo na. Hindi ka pang-alas tres ng madaling-araw lang. Hindi ka pampalipas ng oras. Hindi ka pampaantok. Hindi ka isang libangan.
Matulog ka na.
Gumising na sa katotohanan. Ipahinga na ang puso at isipan.
Matulog ka na.
Ipikit mo na ang iyong mga mata bago ka pa mahulog muli sa patibong niya mayamaya.
© Minsan Okay Lang Ma-traffic | 2021