Isa sa pinakamasasakit ang mga paalam na hindi kailanman sinambit. Wala ka na pala, hindi ko man lang nahalata.
Akala ko, pagod ka lang. Akala ko, kailangan mo lang magpahinga. Akala ko, ayos lang tayong dalawa. Akala ko, wala naman talagang nagbago at ikaw pa rin ang aking sinta.
Wala ka na pala, hindi ko man lang nahalata.
Ang kawalan mo sa akin ng oras, panahon na pala na ginugugol mo sa iba.
Ang pagkaabala kunwari sa trabaho, pagkaabala na pala sa kanya—kaya pala ako ay tila nakaaabala na.
Ang mga malalayo mong tingin at lumilipad na isip, papunta na pala sa bago mong pag-ibig.
Wala ka na pala, hindi ko man lang nahalata.
Pinili kong unawain ka sa lahat ng pagkukulang. Pinilit kong intindihin lahat ng hindi ko na nauunawaan. Pero isa lamang pala ang ibig sabihin ng lahat: wala ka na pala.
© Minsan Okay Lang Ma-traffic | 2023
For more ka-Traffic-inspired stories that make the world stop and make the world go, visit Traffic Digest‘s Traffic Jam Section.